Os socialistas advirten do deterioro asistencial nun hospital “que era unha referencia en Galicia e en España”

O PSOE CORUÑÉS DENUNCIA A “NEFASTA XESTIÓN SANITARIA” DO GOBERNO DE FEIJOO

O hospital da Costa e o CHUAC lideran o ranking de hospitais con maiores listas de espera en Galicia Máis de 7.000 persoas engrosan as listas de espera do hospital coruñés, o que supón case o 20% do total das persoas en listas de espera na sanidade pública galega

A Coruña, 21 de xullo de 2010. O Hospital da Costa e o CHUAC ocupan, respectivamente, a primeira e segunda posición “no lamentable ranking das listas de espera” do sistema público sanitario galego. Así o denunciaron esta mañá os socialistas da provincia da Coruña durante unha rolda de prensa celebrada esta mañá na cidade herculina e que contou coa asistencia do secretario xeral provincial, Salvador Fernández Moreda, a responsable de Sanidade da executiva, Natividad González Laso e os deputados autonómicos Mar Barcón e José Luís Méndez Romeu.

O secretario provincial, Salvador Fernández Moreda, afirmou que os socialistas están “seriamente preocupados polo profundo deterioro do sistema sanitario dende a chegada do Partido Popular ao goberno da Xunta” e subliñou que o complexo hospitalario coruñés, “que era unha referencia en Galicia e en España”, ocupa hoxe un lamentable segundo posto entre os hospitais con máis pacientes en listas de espera.

Segundo os datos ofrecidos hoxe polos socialistas, e obtidos dos datos oficiais facilitados polo SERGAS, máis de 7.000 pacientes agardan hoxe nas listas de espera das diferentes especialidades cirúrxicas do hospital coruñés, o que supón case o 20% do total das persoas en listas de espera na sanidade pública galega. Ademáis, os pacientes qeu teñen como referencia o CHUAC esperan de media case sete días máis que os do resto de Galicia.

A responsable de Sanidade da executiva provincial, Natividad González Laso, atribuíu este incremento das listas de espera á “nefasta xestión sanitaria do goberno de Feijoo”, que “non ten obxectivos de mellora asistencial, senón que aplica o modelo de “ir facendo”.

“O Partido Popular volve ao vello modelo de centrar a sanidade nos hospitais, e de facer da saúde un negocio”, apuntou González Laso, que subliñou que este modelo trae como resultado “que hoxe hai máis xente esperando por unha consulta ou unha intervención, e espera máis tempo”. En concreto, hoxe 2.000 persoas máis que hai un ano engrosan as listas de espera cirúrxica do sistema público de saúde galego, polo que xa son máis de 36.000 os galegos pendentes dunha intervención e 203.753 os que esperan pola primeira consulta co especialista.